Matukio : Wadau Wakipongeza Kituo cha Redio 5 kwa Kuanzisha kwa Kapu la Pasaka, Jijini Arusha

Wafanyakazi wa kituo cha Redio 5 cha jijini  Arusha wakikatishaa mitaa kumsakata mshindi wa kapu la pasaka ,eneo hili linafahamika kwa jina la kwa Morombo na ni maarufu kwa uchomaji wa nyama ya mbuzi

Mshindi maarufu kwa jina la Sule akipokea zawadi katika Kampeni ya Kapu la Pasaka inayoendeshwa na kituo cha Redio 5, baada ya kuwa msikilizaji mzuri wa vipindi mbalimbali vinavyoendeshwa na kituo hicho,kulia ni Ashura Mohamed na Hilda Kinabo watangazaji wa Redio 5 ,Bw.Sule ni kinyozi maarufu katika eneo la kwa Morombo jijini Arusha

Mzee Jumanne Manjano  Mkazi wa Majengo akishuhudia zawadi mbalimbali alizoshinda katika Kampeni ya Kapu la Pasaka inayoendeshwa na kituo cha Redio 5,

Wakazi wa majengo wakiwa katika shughuli zao wakati kampeni ya kapu la pasaka likiwa linaendelea

Mama ntilie akiwa anapokea zawadi ya kapu la pasaka kutoka kwa Watangazaji wa Redio 5, mara baada ya kuibuka mshindi katika kampeni hiyo

Hapa alishindwa kuficha furaha yake wakati akihojiwa na mtangazaji wa kituo hicho Akida Kilango katika mgahawa wake

Dada Ester akiwa anafurahia zawadi zake ,yeye ni msikilizaji mkubwa wa kipindi cha mishe mishe anafanya shughuli zake za kusuka katika maduka ya stendi ndogo

Eneo la stendi ndogo watangazaji wa Redio 5 wakiwa wanamsaka mshindi wa kapu la Pasaka

Mshindi wa kapu la Pasaka ambaye alikuwa ni abiria katika daladala zinazokwenda ngaramtoni akiwa anashuhudia zawadi zake ,hapo akiwa anahojiwa kuhusu furaha yake na mtangazaji Akida

Kampeni hiyo ilichanja mbuga hadi Usariver na huku pia alipatikana mshindi wa kapu la Pasaka

Katikati ni mshindi wa kapu la Pasaka Vicent Costantini ambaye ni mpiga debe na kondakta wa hince za usariverakipokea zawadi yake anasema zawadi hiyo anashukuru sana Redio 5 lakini atampelekea mama yake mzazi,kulia ni mtangazaji G.T na kushoto ni Akida Kilango

Kushoto ni mtangazaji wa Redio 5 Mwanaisha Suleman wa kipindi cha mishe mishe na Richard wakiwa wanamkabidhi mshindi zawadi la kapu la pasaka Bw.William fundi ujenzi katika eneo la Leganga

Mwanaisha Suleiman akiwa anamkabidhi mshindi wa kampeni ya kapu la Pasaka Mama Anna mkazi wa Tengeru

Taswira katika soko la Tengeru

Watanagazi wa Redio 5 wakipiga story mbili tatu na wadau wa Redio hiyo

Mzee Athumani akiwa anafurahia zawadi za Pasaka,zadi hiyo ilimkuta katika kijiwe chake cha kahawa katika soko la Tengeru

Bibi naye akajishindia zawadi ya kapu la pasaka katika eneo la Mianzini,anasema alikuwa ametoka maombi na hakutegemea kama angepata zawadi hiyo,aliwashukuru sana kituo hicho kwa kuanzisha kampeni hiyo kwakuwa kuna watu wengi wenye uhitaji

 

Na Pamella Mollel - Jamiiblog

Taasisi na Makampuni mbalimbali zimeshauriwa  kuzijali Jamii zinazowazunguka kwa  kutoa michango yao ili kuziwezesha kutambulika vyema ndani ya jamii lakini pia Jamii kuthamini mchango wa Kampuni na huduma inayozitoa.

 Wakizungumza kwa Nyakati tofauti Wakazi wa Jiji la Arusha walisema kuwa Makampuni mengi ndani ya Jamii yameshindwa kutambulika kutokana  na kutothamini jamii zinazowazunguka kwa kutokukutana nao wala kuchangia huduma muhimu za Jamii kama huduma za Afya,Elimu na Maji.

Jumanne Manjano  Mkazi wa Majengo  alisema kuwa ikiwa kama Taasisi na Makampuni zitawafuata wananchi  walipo basi ni wazi kuwa Jamii zilizopo katika maeneo yao zitaweza kunufaika na kupata faida kutokana na kuona thamani ya Kampuni husika katika Jamii yao.

Manjano ambaye pia ni mmoja wa Washindi wa Kampeni ya Kapu la Pasaka inayoendeshwa na kituo cha Redio 5, kilichopo Jijini hapa wameshukuru kampuni hiyo kwa kuijali Jamii inayowazunguka kwa kurudisha faida kwa Jamii kwa kuwafuata walipo.

“Ninafurahia  sana zawadi hii nikiwa kama mmoja wa wasikilizaji wa Redio 5 hata hivyo nina uhakika wa kusherehekea vyema Sikukuu ya Pasaka mimi na familia yangu kwa kuwa kapu hili limejaa mahitaji yote muhimu kwa ajili ya sikukuu ukizingatia vitu vinapanda bei sana msimu huu”alisema Manjano

Magreth  Suleiman Mkazi wa Mbauda  Arusha alisema kuwa  ni  vyema Taasisi nyingine ambazo zinatoa huduma kwa jamii kuziwezesha Jamii zinazowazunguka ili kujenga ushirikiano lakini pia jamii kuthamini mchango wa Taasisi hizo na huduma wazatoa.

Hata hivyo alisema kuwa kutokana na ugumu wa maisha sikukuu za sasa zimekosa mwamko kwa kuwa wananchi wanashindwa kumudu gharama za mahitaji muhimu kama vyakula  kutokana na kupanda katika msimu wa sikukuu.

Kwa upande wake msimamizi wa vipindi katika kituo hicho Mathew Philip alisema kuwa kampeni hiyo ni hamasa kwa wasikilizaji na wakazi wa Jiji la Arusha na viunga vyake,ambapo kampuni hiyo imeamua kurudisha faida kwa Jamii, ambapo wanapata fursa ya kujishindia mahitaji muhimu.

Alifafanua kuwa ndani ya kapu hilo kuna vyakula kama mchele,Mafuta ya Kupikia,Unga wa Ngano,Chumvi,Masala,Majani ya chai,Maziwa,Sukari  lengo likiwa ni kumrahishia mshindi kupata mahitaji muhimu ili kusherehekea vyema sikukuu ya Pasaka yeye na familia yake.

Mathew alisema kuwa kampeni ya kapu la Pasaka ni muendelezo wa kampeni ya Nipe Tano inayoendeshwa na kituo hicho lengo likiwa ni kurudisha faida kwa jamii lakini pia  kudumisha Upendo,Amani na Mshikamano.