Matukio : Mohamed Dewji atunukiwa tuzo uongozi bora Afrika

Dar es Salaam. Mbunge wa Singida Mjini (CCM) na mfanyabiashara maarufu nchini, Mohammed Dewji ameshinda tuzo ya kiongozi bora aliyejitolea kwa kiasi kikubwa katika jamii na kuleta mabadiliko Afrika kwa mwaka 2014.

Tuzo hiyo iitwayo African Philanthropist of the year Award 2014 ilitolewa na jarida la uongozi la Uingereza, jijini Dubai hivi karibuni katika Jukwaa la Viongozi wa Afrika.

Ofisa Mtendaji Mkuu wa jarida hilo, Dk Ken Giami alisema wataalamu waelekezi walimchagua Dewji kuwa mshindi kutokana na uongozi bora katika Kampuni yake ya Mohammed Enterprises.

Alisema kigezo kingine kilichompa ushindi ni namna anavyojihusisha na kazi mbalimbali za kijamii. Dk Giami ambaye pia ni mhariri mkuu wa jarida hilo, alisema uwezo wake wa uongozi katika nyanja za biashara, michezo na uwakilishi wa wananchi bungeni vimemfanya mfanyabishara huyo kupata uzoefu wa kutosha na hamasa ya kujitolea.

“Mchango wako katika elimu ni sehemu kubwa ya mafanikio ukiwa mbunge hususan kwa kuendeleza ujenzi wa shule mbili hadi 12, pamoja na kujitolea Sh520 milioni katika kuendeleza sekta hiyo,” alisema Dk Giami katika barua aliyomwandikia Dewji kuhusu ushindi huo.

Alisema mfanyabishara huyo pia amekuwa akisaidia sekta ya afya kwa ushirikiano na Taasisi ya Bilal Muslim Mission ya Tanzania kwa kuwaleta madaktari waliowafanyia upasuaji wagonjwa macho na 179 kupata miwani.

Alisema kiongozi huyo ambaye pia mwaka jana alitajwa na jarida la Forbes la Marekani kuwa tajiri wa 38 Afrika, alisaidia jimbo lake kusambaza maji safi na salama kwa kuchimba visima vingi vya maji.

Dk Giami alisema Afrika linakuwa kwa kasi kiuchumu na kiuvumbuzi, lakini mafanikio hayo yatakuwa na manufaa iwapo kutokuwa na maendeleo shirikishi.