MAGAZETINI: PINDA ATAKA MAHAKAMA IHESHIMIWE, CHADEMA WATAKA VIONGOZI WA KITETO KUSIMAMISHWA KAZI

Waziri Mkuu, Mizengo Pinda. PICHA/Maktaba

Kiteto. Waziri Mkuu, Mizengo Pinda ameagiza wote waliovamia eneo la Hifadhi ya Jamii ya Emborey ya Murtangos, kuondoka ili kuheshimu uamuzi wa mahakama ya rufani na akaagiza waliohusika na mauaji ya watu 15 kusakwa.

Waziri Mkuu pia, ameagiza vijiji saba vinavyounda hifadhi hiyo, kuunda kamati za kutafuta maridhiano, ambazo zitashirikisha wakulima, wafugaji na wazee wa jadi ili kuhakikisha hakutokei mapigano tena.

Tamko hilo la Pinda, limekuja siku chache, baada ya kauli ya Naibu Spika wa Bunge, Job Ndugai ambaye amekuwa akiwatetea wakulima waliovamia hifadhi hiyo, kushauri kuchukuliwa hatua, Mkuu wa Wilaya hiyo, Martha Umbulla na watendaji wengine kwa kushindwa kudhibiti mapigano.

Akizungumza katika kikao cha ndani na viongozi wa Serikali wa Mkoa wa Manyara na Dodoma, Pinda alisema, haiwezekani watu kuvamia ardhi kama haina mwenyewe.

“Nimepita kwenye soko la mahindi Kibaigwa karibu wote wanaeleza kulima Kiteto, sasa hakuna ambaye anazuia watu kutoka eneo moja kwenda lingine kulima lakini lazima sheria zifuatwe,”alisema Pinda.

Pinda alisema hakuna ardhi ambayo haina mwenyewe na kimsingi mwenyewe mkubwa ni rais na kutoka kwake ndipo kuna ardhi ya vijiji, hifadhi, misitu ama ardhi ya jumla.

Hata hivyo, wakazi wa Kiteto walionekana kupandwa na munkari na kumweleza Pinda, kwamba viongozi wa wilaya na mkoa hawawezi kuwasaka na kuwakamata wauaji.

Pinda, alijibu kelele hizo na kusema kuwa, wataangalia jinsi ya kuboresha utaratibu huo na kwamba iwapo wataona kuna haja ya kufanya hivyo, kuna majeshi mengine nchini ambayo yanaweza kuifanya kazi hiyo.

Naye Mkuu wa Mkoa wa Manyara, Erasto Mbwilo, alisema mauaji yaliyotokea hivi karibuni yalitokana na wakulima kutoridhika na kauli yake aliyoitoa katika mkutano wa Januari 9, mwaka huu ya kuwataka kuondoka katika hifadhi hiyo kama utekelezaji wa hukumu ya Mahakama ya Rufani.

Alisema baadhi ya wakulima waliopata nafasi ya kuuliza maswali kwenye mkutano huo walisema hawataondoka kwa namna yoyote katika hifadhi hiyo.

Wakati huohuo, Chama cha Demokrasia na Maendeleo (Chadema) kimemtaka Waziri Mkuu, Mizengo Pinda kuwasimamisha kazi, Mkuu wa Wilaya ya Kiteto pamoja na Mkurugenzi wa Halmashauri, wilayani humo.

Kama hiyo haitoshi, Chadema kimemtaka Pinda kumshauri Rais Jakaya Kikwete kuwafukuza kazi viongozi hao kwa madai ya kushindwa kutatua mgogoro wa wakulima na wafugaji ambao umedumu kwa miaka mingi . Chanzo: MWANANCHI