Na Mwandishi wetu, Arusha
ARUSHA. Mbunge wa Jimbo la Arumeru Magharibi, Dkt. Johannes Lembulung Lukumay, ameweka msingi wa ushirikiano na wataalamu kutoka Ujerumani kwa ajili ya kuimarisha huduma za afya ya kinywa na meno kwa wananchi, huku kliniki maalumu ikitarajiwa kuanza kutoa huduma Januari 2027.
Dkt. Lukumay aliyasema hayo kupitia kikao alichofanya Oktoba 1, 2026 na Mkurugenzi wa DENTOGLOBAL, Dkt. Ursula Subier, kutoka Berlin, Ujerumani, kwa lengo la kujenga ushirikiano katika uwekezaji wa miradi ya afya ya kinywa na meno.
Kupitia ushirikiano huo, kliniki ya kinywa na meno inatarajiwa kuanza kazi Januari 2027, ikiwa ni sehemu ya juhudi za kuongeza upatikanaji wa huduma hizo kwa wakazi wa Jimbo la Arumeru Magharibi na Mkoa wa Arusha kwa ujumla.
Mbali na kliniki hiyo, kutakuwa na huduma za kliniki tembezi zitakazofika katika maeneo mbalimbali ya jimbo hilo ili kusogeza huduma karibu na wananchi na kuongeza fursa ya kupata matibabu ya kinywa na meno.
Hatua hiyo inatarajiwa kusaidia wananchi kupata huduma katika maeneo yao, huku kliniki tembezi zikitoa fursa ya kuwafikia wakazi wa maeneo mbalimbali kulingana na mpango wa utekelezaji wa mradi.
Katika kuimarisha uwezo wa wataalamu wa ndani, mradi huo pia utawezesha wataalamu wa Tanzania kupata mafunzo na uzoefu wa kimataifa nchini Ujerumani, kwa lengo la kuongeza ujuzi katika utoaji wa huduma za afya ya kinywa na meno.
Ushirikiano huo unatarajiwa kutekelezwa kwa kushirikisha DENTOGLOBAL, wadau wa maendeleo na Serikali ya Ujerumani, TATIC, NEPT, Serikali ya Tanzania pamoja na wananchi wa Arumeru Magharibi.
Ushirikiano wa wadau hao unalenga kuweka msingi wa utekelezaji wa miradi ya afya ya kinywa na meno, ikiwemo kuimarisha huduma na kuongeza ujuzi wa wataalamu watakaohusika katika utoaji wa matibabu.
Kuanza kwa kliniki hiyo Januari 2027 kunatarajiwa kuwa hatua muhimu katika utekelezaji wa mpango huo, huku mafanikio yake yakitegemea ushirikiano wa wadau na utekelezaji wa mipango iliyowekwa.
.jpeg)
No comments:
Post a Comment