MICHEZO KIMATAIFA : MANCHESTER UNITED YAPATA KOCHA MPYA , LOUIS VAN GAAL

 Kocha :Louis Van Gaal .AFP/Photo

KLABU ya Manchester United imemteua Louis Van Gaal kuwa kocha wake mpya atakayejaza nafasi ya David Moyes aliyetimuliwa baada ya kuwa kocha kwa miezi 10 pekee.

Mholanzi huyo ametia saini mkataba wa miaka miaka mitatu na ataanza majukumu yake uwanjani Old Trafford msimu ujao ikiwa ni  baada ya kuongoza taifa lake kwenye kombe la dunia litakaloanza mwezi ujao nchini Brazil. Msaidizi wa Van Gaal atakuwa ni Ryan Giggs mkongwe wa klabu hiyo ambaye alitwaa majukumu hayo baada ya kufukuzwa kwa Moyes zikiwa zimesalia mechi tatu msimu kukamilika.

“Ni furaha kubwa kwangu na naiona fahari kupata furasa ya kuifundisha mojawapo ya klabu kubwa duniani Manchester united,” kocha huyo alisema baada ya uteuzi huo.

Van Gaal mwenye umri wa miaka 62, amewahi kuzifundisha klabu za Ajaz (Uholanzi), Barcelona (Uhispania) na Bayern Munich (Ujerumani) ambazo aliziwezesha kushinda mataji ya Ligi Kuu kabla ya kuajiriwa kuinoa kikosi cha taifa cha Uholanzi maarufu kama 'oranje'.

Kocha huyo anategemewa kufufua matumaini ya United baada ya klabu hiyo kumaliza ya saba msimu huu chini ya Moyes na kuandikisha historia ya kuwa na msimu mbaya zaidi kwa kipindi cha miaka 24.

Van Gaal alishinda mataji mawili ya La Liga akiwa na Barcelona na kujiunga na Bayern aliyotwaa nayo kombe la German Cup na kufika fainali ya Uefa.

Alijizolea umaarufu mwaka wa 1995 baada ya kukiongoza kikosi kichanga cha Ajax kilichojumulisha Clarence Seedorf, Patrick Kluivert na wengineo kutwa kombe la Uefa kwa kuilaza AC Milan ya Italia.