BAVICHA ARUSHA : Nanyaro: Kipaumbele kiwekwe kwenye elimu

Makamanda wa bavicha walipo mtembelea Mjane wa Marehemu Kamanda Mbwambo, Ephata Nanyaro (wa pili Kushoto). Picha na MAKTABA

Ephata Nanyaro ni miongoni mwa vijana wanaojitanabaisha kuwa wanachama na viongozi waaminifu wa Chama cha Demokrasia na Maendeleo (Chadema) mkoani Arusha.

Ni mwenyekiti wa Baraza la Vijana la Chadema (Bavicha) Mkoa, na vilevile ni mwenyekiti wa chama hicho wa Wilaya ya Arusha Mjini. Nanyaro ambaye anajulikana kimsimamo ndani ya chama hicho, pia ni Diwani wa Kata ya Levolosi kupitia chama hicho cha upinzani nchini.

Wiki iliyopita nilipata wasaa wa kuzungumza naye mambo mbalimbali kuhusu yeye na siasa ambapo pamoja na mambo mengine anaeleza malengo na mikakati yake katika siasa kuwa ni kutetea wananchi wanaoonewa na kukandamizwa na mfumo kandamizi.

Swali: Ni lini hasa ulianza kujishughulisha na masuala ya siasa, na je, ni kitu gani kilikusukuma?

Jibu: Nilianza rasmi kushiriki shughuli za kisiasa mwaka 2005, ingawa kabla ya hapo nilikuwa mfuatiliaji wa siasa za upinzani tangu mwaka 1995. Nilijikuta nikivutiwa na jinsi viongozi walivyokuwa wakiibua hoja nzito za kuukosoa utawala kwa lengo la kutetea wananchi.

Hii ilinifurahisha sana na nikajikuta nikivutiwa na kupenda kufuatilia habari mbalimbali za siasa. Niliendelea kuwa karibu na shughuli za siasa hadi mwaka 2005 nilipojiunga rasmi Chadema. Pia niliamua kuingia kwenye siasa ili kupata uwanja wa kupigania mabadiliko katika Taifa langu.

Swali: Kwa nini ulichagua Chadema na siyo chama kingine?

Jibu: Nilichagua Chadema kwa kuwa ni chama pekee chenye dhamira ya kweli ya kuwatumikia Watanzania. Misingi ya kuanzishwa kwa Chadema ndiyo iliyonivutia, hasa demokrasia. Taifa letu lilikuwa na bado linapita katika kipindi kigumu ambacho hakuna demokrasia ya kweli wala maendeleo.

Swali: Vipi umejipangaje kukabiliana na changamoto za kisiasa ndani na nje ya chama chako.

Jibu: Changamoto kwenye siasa ni nyingi lakini ukiongozwa na dhamira ya kweli, huwezi kushindwa. Nimekuwa nikiongozwa na maslahi ya taifa kuliko maslahi madogo madogo ya watu au vikundi fulani.

Hii ndiyo imani yangu kwa kuamini kuwa maana taifa litaendelea kuwepo lakini watu watapita. Kwa upande wa siasa za ndani ya chama Mkoa wa Arusha hususani Wilaya ya Arusha Mjini ina changamoto nyingi mno, hivyo chama tunashirikiana pamoja na jamii kukabiliana na changamoto za kisiasa na kiuchumi.

Bahati mbaya chama tawala ambacho kimsingi hakipo tena, kimeshindwa kutatua changamoto za kiuchumi badala yake Serikali inawekeza zaidi katika kukihujumu chama chetu, hivyo sisi tuna uongozi shirikishi, kwa maana ya kushirikisha jamii kwa ujumla ili kutatua changamoto hizo.

Swali: Kwa nini uligombea udiwani?

Jibu: Niligombea ili niweze kubadilisha sheria kandamizi zinazotungwa na watendaji wa halmashauri na ambazo zinawaumiza wananchi wanyonge wasio na mitaji wala uwezo.

Kwa mfano katika mtaa ninaoishi mwaka 2006 nilihamasisha wananchi wenzangu tukajenga barabara kwa kiwango cha changarawe, baadaye nikaja kukamatwa na maofisa wa manispaa kwa kosa la kuboresha barabara bila kibali, nilitakiwa ama nilipe faini ya Sh50,000 au wanifungulie kesi mahakamani. Nilikubali kupelekwa mahakamani ambapo kesi iliishia hewani.

Swali: Una malengo gani kisiasa?

Jibu: Malengo yangu kisiasa ni kuwatumikia kwa uadilifu wapigakura wa Levolosi kwa kipindi hiki kilichobaki, bado tuna kazi kubwa ya kufanya kwenye maeneo ya miundombinu

Malengo yangu vilevile ni kutetea wananchi walioonewa na kukandamizwa na mfumo kandamizi. Unajua katika Serikali kuna mifumo ya kiuongozi ambayo inakandamiza haki za watu. Kuna mifumo ambayo siyo shirikishi, na hii inasababishwa na kukosekana kwa wawakilishi wa wananchi katika vyombo vya kutolea uamuzi.

Ukiangalia Bunge, kwa mfano, halina wawakilishi wa kijamii na badala yake wote waliopo ni wawakilishi wanasiasa. Hakuna mbunge anayewawakilisha wakulima, wanafunzi wa vyuo vikuu, wafugaji…Hii inasababisha hata sheria zinazotungwa na Bunge zinakuwa hazina maslahi ya kijamii. Maana Bunge halina wawakilishi mbalimbali wa kijamii.

Mfano mdogo ni ile sheria ya fao la kujitoa ambalo wabunge wote waliipitisha, kwa mtazamo wangu hii sheria ilipita bila kupingwa kutokana na kukosekana kwa wawakilishi wa wananchi ndani ya Bunge wanaoumizwa na sheria ile.

Swali: Ni mwanasiasa gani wa nje au ndani ya nchi ambaye unavutiwa naye na ambaye ndiye aliyekuhamasisha kujiingiza katika siasa?

Jibu: Kwa kweli mtu aliyenivutia na aliyenishawishi kujiunga na siasa ni Freeman Mbowe. Nimekuwa nikivutiwa na jinsi kiongozi huyu anavyojenga na kusimamia hoja zake, anavyoibua vitu na kutetea maslahi ya wananchi na kwa kweli naweza kukiri kuwa nimejifunza sana kupitia kiongozi huyu.

Swali: Ungepewa nafasi ya kuongoza nchi ungeanza na lipi unaloona limezorota?

Jibu: Kama ningepata nafasi ya uongozi wa nchi eneo ambalo ningeanza nalo ni katika sekta ya elimu. Ni imani yangu kuwa elimu ndiyo msingi wa maendeleo kwa mtu mmoja mmoja na kwa taifa kwa ujumla.

Yapo mambo mengi yanayolalamikiwa na ambayo yanasababisha elimu yetu iendelee kudidimia. Masuala kama ya kutokuwepo kwa mitalaa, hili limepigiwa kelele na wabunge lakini inashangaza hakuna marekebisho yoyote yaliyofanywa.

Nikipata fursa ya kuongoza ambayo naamini siku moja nitaipata, nitalimulika eneo hilo na kuhakikisha upungufu wote unaotajwa unarekebishwa na elimu inaimarika. Elimu ndiyo msingi wa kila kitu na hakuna Taifa lolote duniani ambalo limeendelea bila elimu.

Swali: Nielezee historia fupi ya maisha yako.

Jibu: Kwanza nina umri wa miaka 30, nina mke na watoto wawili – Ethan na Ethana. Nimekuwa kiongozi wa ngazi mbalimbali ndani ya Chadema na hadi sasa nashikilia nafasi ya Uenyekiti wa Baraza la Vijana (Bavicha) Mkoa wa Arusha. Vilevile mimi ni Mwenyekiti wa Chama wa Wilaya ya Arusha Mjini na kama nilivyoeleza huko juu mimi ni Diwani wa Levolosi. CHANZO : MWANANCHI